नारायणगाव, किरण वाजगे

जिल्हा परिषद प्राथमिक केंद्रशाळा वारूळवाडी (ता.जुन्नर) येथे झाडांना राख्या बांधून अनोखे रक्षाबंधन साजरे करण्यात आले.

वृक्षवल्ली आम्हा सोयरे वनचरे या उक्तीप्रमाणे निसर्ग आणि पर्यावरण यांचा थेट संबंध आपल्या जीवनशैलीशी आहे. खरंतर, झाडे म्हणजे निसर्गाने दिलेले वरदान आणि बहुमोल अशी भेटचं आहे. शिवाय, झाडे म्हणजे आपल्या जीवनाचा मुख्य आधारस्तंभ आहेत. झाडे आपल्या आयुष्यात इतकी महत्वाची आहेत की त्यांच्याशिवाय आयुष्य जगण्याची कुणीही कल्पना सुद्धा करू शकत नाहीत. याचं मुख्य कारण म्हणजे झाडे आपल्याला मोठ्या प्रमाणावर ऑक्सिजन देतात. झाडांचे आपण रक्षण केले तरच झाडे आपले रक्षण करतील.असे प्रतिपादन वारूळवाडी केंद्राच्या केंद्रप्रमुख माधुरी शेलार यांनी केले.

कार्यक्रम प्रसंगी वारुळवाडी गावाचे प्रथम नागरिक-सरपंच राजेंद्र मेहेर ,ग्रा.प.सदस्य जंगलभाऊ कोल्हे,तंटामुक्तीचे अध्यक्ष शिवदत्त-मामा संते,ग्रामविकास अधिकारी सतिश गवारी, श्रीकांत आल्हाट,विशेष शिक्षिका संगिता डोंगरे,शाळेच्या मुख्याध्यापिका शोभा डोंगरे ,विद्यार्थी,शिक्षकवृंद आदी उपस्थित होते.

वारूळवाडी गावचे सरपंच राजेंद्र मेहेर म्हणाले की, वन ट्री चॅलेन्ज ही संकल्पना सर्व नागरिकांनी जरूर राबवावी.पर्यावरणाची कशी हाणी होत आहे, याबद्दल पुस्तकेच्या पुस्तके लिहिली गेली आहेत, माहितीपट बनले आहेत, आंदोलने झाली आहेत… पण जोपर्यंत प्रत्येक माणसाला हा विषय आपला वाटत नाहीत. तोपर्यंत जगभरातील सत्ताधीशांना याचे महत्त्व पटणार नाही. त्यासाठी ‘वन ट्री चॅलेन्ज’! म्हणजे प्रत्येकाने आपल्या आयुष्यात एक तरी झाड लावून त्याचे मोठे होई पर्यंत संवर्धन करावे. आपल्यातील प्रत्येकाला ‘वन ट्री चॅलेन्ज’ स्वीकारावेच लागेल.यासाठी प्रत्येक मुलाने तयार केलेले सीड बॉल मोकळ्या जागी योग्य प्रकारे खड्डा घेऊन लावावेत.

शाळेच्या मुख्याध्यापिका यांनी आणि शाळेतील शिक्षिका यांनी झाडांचे महत्त्व विषद केले. आपण सर्वांनी शाळेत असल्यापासून “झाडे लावा, झाडे जगवा” हा सुविचार अनेक वेळा ऐकला आहे. झाडे आपल्या जीवनाचा सार आहेत. झाडांशिवाय पृथ्वीवरील सजीवसृष्टीची कल्पना करणे देखील व्यर्थ ठरेल. जिथे शक्य असेल तिथेतिथे वड, पिंपळ, चिंच, जांभूळ असे वृक्ष लावायला हवेत आणि जगवायला हवेत. आपण लावलेली ही झाडे भविष्यात इतर संकटाशी सामना करण्याची नवी उमेद देतात .सर्व वनस्पती या पृथ्वीवरील अमूल्य ठेवा आहेत. शिवाय, वृक्षांमुळेच माणसाला त्याच्या सर्व मूलभूत गरजा पूर्ण करण्यासाठी अत्यावश्यक असलेली संसाधने प्राप्त होतात. जर झाडे नसतील तर पर्यावरणाचा सगळा समतोल बिघडेल.जर झाडे तोडण्यासोबतच मानवाने नवीन रोपांची लागवड केली नाही तर, आपल्या पृथ्वीवरील जीवसृष्टी संकटात येईल . कित्येक शतकानुशतके झाडे सजीवांच्या जीवनाचा अविभाज्य असा भाग आहेत.जगाची तापमानवाढ रोखायची असेल तर कार्बन डायऑक्साइचे उत्सर्जन कमी करायला हवे. कार्बन शोषून घेऊन ऑक्सिजनचा पुरवठा करणारे झाड नावाचं एक नैसर्गिक यंत्र आपल्याकडे आहे. अगदी प्राचीन काळाच्या पाषाण युगापासून ते आजच्या विज्ञान युगापर्यंत सर्व जीव हे वनस्पतींवर अवलंबून आहेत. पृथ्वीवर पावसाचे आगमन सजीवसृष्टीला ऑक्सिजन झाडांमुळे मिळते. प्रदूषण कमी करण्यासाठी झाडे आपल्याला खूप उपयुक्त ठरतात.म्हणून आपण झाडांचे आपण रक्षण केले तर झाडे आपले रक्षण करतील.झाडे कधीच न तोडण्याची व वृक्षसंवर्धनाची जबाबदारी घेण्याची प्रतिज्ञा मुलांना घेतली आली.

कार्यक्रमाची व्यवस्था स्वाती शिंदे , वैशाली वामन ,प्रतिमा नलावडे,अनिता साबळे यांनी केली.
प्रास्ताविकातून संपूर्ण कार्यक्रमाची माहिती मुख्याध्यापिका शोभा डोंगरे यांनी दिली.

गणेश‌,सातव – वाघोली

रक्षाबंधन म्हणजे बहिणीने भावास राखी बांधून आयुष्यभर स्वतःचे रक्षण करण्यासाठी भावाकडून घेतलेली हमी.परंतु खऱ्या अर्थाने या भारत देशाचे संविधान हाच आपला रक्षण करता मोठा भाऊ असून त्याचे पूजन करून आणि त्याला राखी बांधून वंचितांच्या न्याय हक्कासाठी रचनात्मक पद्धतीने पंचवीस वर्ष संघर्ष करणाऱ्या संतुलन संस्थेमध्ये आगळ्या वेगळ्या पद्धतीने रक्षाबंधन सण साजरा करण्यात आला.

संविधानाचे पूजन व औक्षण करून त्यास राखी बांधून महिला भगिनी व विद्यार्थ्यांनी स्वतः बरोबर देश रक्षणासाठी प्रार्थना केली. “बंध हा प्रेमाचा नाव ज्याचे राखी, राखी बांधून संविधानास देश संविधानाच्या हाती” म्हणत उत्सव साजरा केला.

महिलांनी पारंपारिक पद्धतीबरोबरच आजच्या आधुनिक पद्धतीने देश सेवेची जबाबदारी ओळखून आपले कार्य करावे, तसेच या वर्षी अमृत महोत्सव साजरा करतांना हर घर तिरंगा बरोबरच हर घर संविधान सुद्धा महत्वाचे आहे असे विचार संतुलन संस्थेचे संस्थापक अँड.बी.एम.रेगे यांनी मांडले. त्याच्या संकल्पनेतून आणि संचालिका अँड. पल्लवी रेगे यांच्या मार्गदर्शनातून दगडखाण आणि कष्टकरी कामगारांच्या शुभहस्ते खराडी येथील तुळजाभवानी नगर येथे संतुलन भवन मध्ये साजरा करण्यात आला.

या प्रसंगी दगडखाण कामगार परिषदेचे पदाधिकारी,संतुलन पतसंस्था,संतुलन महिला कष्टकरी परिषद, संतुलन पाषाण शाळा शिक्षक वृंद व कर्मचारी मोठ्या संख्येने उपस्थित होते.कार्यक्रमाचे सूत्रसंचालन आदिनाथ चांदणे यांनी तर आभार अँड. पल्लवी रेगे यांनी मानले.

नारायणगाव (किरण वाजगे)

नारायणगाव रोटरी क्लब च्या वतीने रक्षाबंधनाचे औचित्य साधून नारायणगाव पोलीस स्टेशन मधील पोलिस बांधवांना राखी बांधून, औक्षण करुन व पेढे भरवूनअनोख्या पद्धतीने रक्षाबंधन सण साजरा करण्यात आला.

पोलीस हे २४ तास ऑन ड्युटी असतात त्यांना कोणताच सण आपल्या कुटुंबीयांसोबत साजरा करता येत नाही. आपल्या रक्षणाची जबाबदारी घेणाऱ्या पोलिसांप्रती कृतज्ञता व्यक्त करण्यासाठी व सामाजीक बांधिलकीच्या दृष्टीकोणातून रक्षाबंधन’ सारखे सण साजरे करण्यात येतात. असे रोटरी क्लबचे अध्यक्ष डॉ. हनुमंत भोसले यांनी सांगितले.

या वेळी सहाय्यक पोलीस निरीक्षक पृथ्वीराज ताटे, पोलीस उपनिरीक्षक सनिल धनवे, विनोद दुर्वे यांनी देखील मनोगत व्यक्त करत रक्षाबंधनाच्या शुभेच्छा दिल्या.

या कार्यक्रमात रो डॉ. रामदास उदमले, रो. योगेश भिडे, रो. सचीन घोडेकर, रो. अनिल मालानी , रो. कवलजीतसिंग बांगा, रो. Ann, प्रिया कामत, प्रिया घोडेकर, .सिमा महाजन, आशा डहाळे , रेखा ब्रम्हे, मंजुश्री लोखंडे, सुनिता बोरा, सुनंदा मालानी, अमृता भिडे, केतकी काचळे, निर्मला मेहेर, अनिता उदमले, मिता डोके, सुनिता वाघ आदी मान्यवर या कार्यक्रमाला उपस्थित होते.
कार्यक्रमाची प्रस्तावना डाँ.सवीता भोसले यांनी केली. सूत्रसंचालन मंगेश मेहेर यांनी केले. तर आभार सुनिता बोरा व सुनंदा मालानी यांनी मानले.

उरुळी कांचन

महात्मा गांधी विद्यालय उरुळी कांचन माजी विद्यार्थी मेळावा दहावी २००० -२०२१ बॅचच्या निमित्ताने तब्बल तीनशे माजी विद्यार्थी व तत्कालिन शिक्षक व सेवक वर्ग यांनी सहभाग नोंदवला तसेच विविध उपक्रमांचे आयोजन केले होते.

याप्रसंगी शिक्षकांचा सत्कार करणे, सेवकांचा सत्कार करणे, वृक्षारोपण करणे, शाळेला उपयोगी वस्तु भेट स्वरुपात देणे, गरजु विद्यार्थ्याना फि साठी मदत देणे इत्यादी स्तुत्य उपक्रम घेण्यात आले. पुढील काळात देखिल शाळेला मदत देण्याचे ठरवले आहे. २२ वर्षानंतर हा योग आला असल्याने माजी सर्व विद्यार्थ्यांनी उस्फुर्त सहभाग उपस्थितीत राहून घेतला.

या मेळाव्याचे नियोजन महादेव काकडे, हर्षल टिळेकर, सागर कांचन, सिध्दार्थ शिंदे, प्रकाश धुकटे, आण्णा महाडिक, उमेश कांचन, नितीन लवांडे, सुमीत वनारसे, कैलास पटेल, अशोक गोते, प्रविण जुन्नरकर, औदुबंर वेदपाठक, निखील कोतवाल, संतोष भोसले, रुपेश टेहरे, प्रदिप ससाणे, आसिफ शेख, शर्मीला तुपे, छाया जगताप,प्रिती कांचन,ज्योती नरके, गिता कांचन, शुभांगी गायकवाड, सोनाली खेडेकर, फरीदा शेख, मिनाक्षी बोराटे, भारती कांचन यांनी योगदान दिले.

कार्यक्रमाचे सुत्रसंचालन हर्षल टिळेकर, शर्मीला भोसेकर, दिपाली धाउत्रे, विजय कांचन यांनी केले तर स्वागत सागर कांचन व सारीका कांचन यांनी केले. विद्यार्थ्यानां शाळेची आठवण म्हणुन भेट स्वरुपात एक स्मृतिचिन्ह देण्यात आले. आभार महादेव काकडे व भारती कांचन यांनी मानले.

कुरकुंभ : सुरेश बागल

दौंड शहरात वारंवार जाणारी लाईट यामुळे सर्वसामान्य माणसाचे हाल होत आहेत अशा निकृष्ट कामाची चौकशी व्हावी यासाठी मुख्य अभियंता महावितरण कार्यालय दौंड येथे दौंड शहर काँग्रेस कमिटीच्या वतीने निवेदन देण्यात आले.पावसाळा सुरू होण्यापूर्वी व एप्रिल आणि मे महिन्यात पावसाळ्यापूर्वीची कामे करण्यासाठी दिवसातून चार ते आठ तास भारनियम करण्यात आले होते. सदर कामे झालेली असताना सुद्धा गेल्या दोन महिन्यापासून दिवसातून पाच ते सहा वेळा लाईट घालवली जात आहे.

वेळोवेळी आंदोलन करून व निवेदन देऊन सुद्धा शहरातील स्थितीत सुधारणा झालेली नाही. यामुळे सर्वसामान्य माणसांचे हाल होत आहेत. या निवेदनाद्वारे विनंती करून सांगण्यात आले आहे की, दौंड शहरातील गेल्या तीन महिन्यापासून झालेल्या कामाची चौकशी करण्यात यावी तसेच निकृष्ट साहित्य वापरून काम करणाऱ्या ठेकेदारावर व अधिकाऱ्यावर योग्य ती कारवाई करावी. आणि शहरात चांगल्या पद्धतीने काम होण्यासाठी कामाची व येणाऱ्या निधीची माहिती उपलब्ध व्हावी. सदर प्रकरणात लवकरात लवकर योग्य ती कारवाई करावी अन्यथा दौंड शहर काँग्रेस कमिटीच्या वतीने आंदोलन करण्यात येईल असा इशारा देण्यात आला आहे.

या निवेदनावर अध्यक्ष दौंड शहर कॉंग्रेस हरेष ओझा,जिल्हाध्यक्ष पर्यावरण कॉंग्रेस तन्मय पवार,जिल्हा प्रतिनिधी कॉंग्रेस अतुल जगदाळे,तालुका अध्यक्ष युवक कॉंग्रेस श्रेयस मुनोत,अध्यक्ष दौंड शहर अल्पसंख्यक कॉंग्रेस रज्जाक भाई शेख आणि उपाध्यक्ष अल्पसंख्यक कॉंग्रेस सुरेश क्षिरसागर यांनी सह्या केलेल्या आहेत.