नारायणगाव (किरण वाजगे)

जुन्नर तालुक्यामध्ये बिबट सफारीचा प्रस्तावित प्रकल्प अहवाल तयार करण्यासाठी १ कोटी ५० लक्ष रुपयांचा निधी जिल्ह्याचे पालकमंत्री व राज्याचे अर्थमंत्री अजित पवार यांनी मंजूर केला आहे. जिल्हा नियोजन समितीच्या नाविन्यपूर्ण योजनेच्या अंतर्गत हा निधी प्राप्त झाला आहे. अशी माहिती जुन्नर तालुक्याचे आमदार अतुल बेनके यांनी दिली.

दरम्यान जुन्नर येथील छत्रपती शिवाजी महाराजांच्या अश्वारूढ पुतळा अनावरण कार्यक्रम प्रसंगी उपमुख्यमंत्री अजित पवार मागील महिन्यात आले होते व या दौऱ्यादरम्यान माणिकडोह येथील वन्यजीव हॉस्पिटल उद्घाटन कार्यक्रमाप्रसंगी उपमुख्यमंत्र्यांनी बिबट सफारी प्रकल्पाच्या प्रकल्प अहवाल निर्मितीसाठी निधी देण्याचे आदेश पुणे जिल्हाधिकाऱ्यांना दिले होते. या आदेशाची अंमलबजावणी आता झाली आहे. बिबट सफारी प्रकल्पाचा प्रकल्प अहवाल तयार करण्यासाठी १ कोटी ५० लक्ष रुपयांचा निधी प्राप्त झाला आहे. हा प्रकल्प अहवाल तयार करण्यासाठी वन अधिकारी, त्याचप्रमाणे पर्यटन तज्ञ व अभ्यासक यांच्या सहकार्याने अहवाल तयार करण्यात येईल त्यानंतर लवकरच हा परिपूर्ण अहवाल शासनाकडे सादर करण्यात येईल.

अजित पवार यांनी जुन्नर दौऱ्या दरम्यान दिलेला शब्द पाळला याबद्दल आम्ही त्यांचे मनःपूर्वक आभार मानत असून मुख्यमंत्री उध्दव ठाकरे, पर्यटन मंत्री आदित्य ठाकरे यांचेही आपण ऋणी असल्याचे जुन्नर तालुक्याचे आमदार अतुल बेनके यांनी म्हटले आहे

नारायणगाव : किरण वाजगे

तमाशा पंढरी म्हणून संपूर्ण महाराष्ट्रात प्रसिद्ध असलेल्या नारायणगाव (ता. जुन्नर) येथील श्री मुक्ताबाई देवी व काळोबा देवाच्या यात्रेनिमित्त मंगला बनसोडे यांच्या तमाशा व्यासपीठावर सोमवार (दि.२ रोजी ) सादर केलेल्या गीतांमधून बैलगाड्या सह जल, वायू, अग्नी, आकाश व पृथ्वी या पंचतत्वाचा अनोखा संगम येथे पाहायला मिळाला.
नारायणगाव येथे यात्रेनिमित्त सलग सात ते आठ लोकनाट्य तमाशा कार्यक्रम दरवर्षी आयोजित केले जातात. यामुळे तमाशा कार्यक्रम सादर करणारा प्रत्येक फडमालक नारायणगावात तमाशा करताना काहीतरी नावीन्यपूर्ण सादरीकरण करण्याचा प्रयत्न करत असतो.

याच अनुषंगाने आघाडीचे फडमालक मंगला बनसोडे व नितीन करवडीकर यांनी थेट तमाशाच्या व्यासपीठावर बैलगाडा आणून त्याला दोन पायाचे बैल जुंपले. अर्थात दोन पायाचे बैल म्हणजे दुसरे तिसरे कोणी नसून बैलाचा मुखवटा परिधान करणारे दोन कलाकार बैलगाड्याला जुंपले होते.
हे दृश्य पाहताना अनेकांनी एकच जल्लोष करत “नाद एकच एकच बैलगाडा शर्यत” या गाण्यावर जोरदार ठेका धरला.

याचप्रमाणे “टिपटिप बरसा पानी” या गाण्या द्वारे जल, वायू, अग्नी, आकाश व पृथ्वी या पंचतत्वाचा अनोखा संगम तमाशाच्या व्यासपीठावर सोमवारी रात्री पहायला मिळाला.

तमाशा कार्यक्रमामध्ये ही अनोखी गीते नितिन बनसोडे यांच्यासह नृत्यांगना रमा शेवगावकर, कोमल शेवगावकर, रेश्मा पुणेकर व कामिनी मुंबईकर तसेच त्यांच्या सहकलाकारांनी सादर केली. तत्पूर्वी सुरुवातीला मंगला बनसोडे यांच्या नृत्य अदाकारीने देखील रसिक प्रेक्षक घायाळ झाले.

थेट व्यासपीठावर बैलगाडा घेऊन जाणाऱ्या व स्टेजवर पाण्याचा पाऊस पाडून व अग्नी प्रज्वलित करून एकाच ठेक्यात नृत्य सादर करणाऱ्या नितिन बनसोडे यांच्या अनोख्या स्टाइल ची चर्चा मात्र नारायणगावसह संपूर्ण पंचक्रोशीत होत आहे.

दरम्यान तमाशा कार्यक्रमामध्ये यात्रा कमिटीच्या वतीने मंगला बनसोडे व नितिन बनसोडे यांचा विशेष सन्मान करण्यात आला.

या प्रसंगी दत्तोबा फुलसुंदर, विकास सोसायटीचे व्हाईस चेअरमन किरण वाजगे, अनिल खैरे, विजय विटे, संतोष शशीनाना खैरे, संभाजी पाटे, अक्षय वाव्हळ, राम शेवाळे, गणेश पाटे, हितेश कोराळे, स्वप्निल भोंडवे, आशिष वाजगे, श्री भुजबळ, श्री मेहत्रे आदी मान्यवर उपस्थित होते. यावेळी मंगला बनसोडे नितिन बनसोडे यांच्या तमाशा ला रसिकांनी मोठी गर्दी केली होती.

गणेश सातव,वाघोली

सामाजिक कार्यात सातत्याने भरीव योगदान देणाऱ्या ‘वन नेटवर्क एंटरप्रायझेस’ या पुणे स्थित सॉफ्टवेअर कंपनीच्यावतीने पुणे महानगरपालिका माध्यमिक शाळांच्या विद्यार्थ्यांसाठी संगणक सख्य या प्रकल्पाचा शुभारंभ सावित्रीबाई फुले माध्यमिक विद्यालय,भवानी पेठ येथे शुभारंभ करण्यात आला असून आधार सामाजिक संस्था पुणे या संस्थेस प्रकल्प अंमलबजावणीची जबाबदारी सोपवण्यात आली आहे.या प्रकल्पाअंतर्गत मनपाच्या माध्यमिक शाळांना प्रत्येकी पाच संगणक,पाच संगणक टेबल व खुर्च्या तसेच एक प्रिंटर व स्कॅनर या साहित्यासह सुसज्ज संगणक कक्षाद्वारे विद्यार्थ्यांना संगणक व इंटरनेट वापरासाठी प्रशिक्षण देण्यात येणार आहे.

या प्रसंगी बोलतांना वन नेटवर्क एन्टरप्रायझेसचे संचालक मा. श्री. समीर कुलकर्णी म्हणाले की, “वन नेटवर्क एन्टरप्रायझेस” ही कंपनी सॉफ्टवेअर क्षेत्रात गुणवत्तापूर्ण कार्यासाठी ओळखली जाते सोबतच एक सामाजिक जबाबदारी म्हणून वंचित व गरजू घटकांसाठी योगदान देत आहे. मनपा शिक्षण मंडळातर्फे आर्थिक मागास घटकातील विद्यार्थ्यांच्या सर्वांगीण विकासासाठी प्राथमिक व माध्यमिक शाळांमार्फत दर्जेदार व गुणवत्तापूर्ण शिक्षण मोफत दिले जाते ही पुणे शहरासाठी अभिमानाची बाब आहे. मनपा शिक्षण मंडळाच्या या कार्यात सहभाग म्हणून वन नेटवर्क एंटरप्रायझेसच्या वतीने माध्यमिक शाळातील विद्यार्थ्यांमध्ये संगणक व इंटरनेट कौशल्य विकसित करून येणाऱ्या स्पर्धात्मक काळासाठी त्यांची तयारी करून घेण्यात येणार आहे.संगणक शिक्षक बालसुलभ व अनौपचारिक पध्द्तीने विद्यार्थ्यांना मार्गदर्शन करतील.आधार सामाजिक संस्था ही जबाबदारी यशस्वीपणे पार पाडेल व पुणे मनपा शिक्षण मंडळाचे आवश्यक ते सहकार्य लाभेल याची आम्हाला खात्री आहे.

या प्रसंगी मा.श्री. दामोदर उंडे, (उपशिक्षणाधिकारी,पुणे मनपा शिक्षण मंडळ माध्यमिक व तांत्रिक विभाग),गीतांजली पडळकर (वरिष्ठ व्यवस्थापक वन नेटवर्क एन्टरप्रायझेस) वैशाली गुडदे (प्रकल्प संचालिका आधार सामाजिक संस्था)अमोल शिंदे (अध्यक्ष आधार सामाजिक संस्था)राजेंद्र गाढवे (मुख्याध्यापक सावित्रीबाई फुले माध्यमिक विद्यालय) उपस्थित होते. प्रकल्पासाठी पोपट श्रीराम काळे (शिक्षणाधिकारी,पुणे मनपा शिक्षण मंडळ माध्यमिक व तांत्रिक विभाग) यांनी मार्गदर्शन केले.

गणेश‌ सातव,वाघोली

नवोदित कवी निलेश सरवदे उर्फ निलेशकुमार स्वरचित व मैत्री पब्लिकेशन प्रकाशित ‘पांथस्थ’ या कवितासंग्रहाचा प्रकाशन सोहळा नुकताच पुण्यात एस. एम.जोशी सोशालिस्ट फाऊंडेशनच्या सभागृहात पार पडला.

या नवकवितांच्या संग्रहाचे प्रकाशन जेष्ठ कवी,लेखक डॉ. प्रदीप आवटे,अरिहंत एज्युकेशन फाउंडेशनचे व्यवस्थापकीय संचालक डॉ.भूषण पाटील,प्रकाशक मोहिनी कारंडे,निलेशकुमार यांचे आई-वडील यांच्या हस्ते व जेष्ठ साहित्यक,८९ व्या अखिल भारतीय मराठी साहित्य संमेलनाचे माजी अध्यक्ष डॉ.श्रीपाल सबनीस यांच्या अध्यक्षतेखाली पार पडले.

प्रकाशन सोहळ्यानंतर डॉ. प्रदीप आवटे कवितासंग्रहाविषयी बोलत असताना म्हणाले, “प्रेम उमगणं महत्वाचं कारण द्वेष करायला फार अक्कल लागत नाही. ते पुढे म्हणाले, परिघावरील मंडळींचे प्रश्न आपल्याला या कवितेमध्ये दिसत राहतात. तुम्ही जे जगता त्या जगण्याला प्रश्न विचारण्यासाठी लिहता ते ही निलेशच्या कवितेत दिसतं. या कविता आई वडिलांच्या जगण्यातून आली आहे.”

डॉ. भूषण पाटील यांनी बोलताना शिक्षणाचं महत्व अधोरेखित करत कवितासंग्रहाला शुभेच्छा दिल्या.सोबतचं शिरुर कासार पंचायत समितीच्या सभापती उषाताई सरवदे यांनी कवी निलेशकुमार यांच्या बालपणीच्या आठवणींना उजाळा देत,कवितासंग्रहाला शुभेच्छा दिल्या.

जेष्ठ साहित्यीक, विचारवंत व समीक्षक डॉ. श्रीपाल सबनीस आपल्या अध्यक्षीय भाषणात म्हणाले, निलेशकुमार अत्यंत सूचक, गांभीर्यपूर्ण आकलनाची सूत्र काव्यात्म करून आपल्या समोर मांडत आहे. वैचारिक दृष्टीने, कल्पनेच्या दृष्टीने, प्रतिमेच्या दृष्टीने सामर्थ्याच्या दृष्टीने या अत्यंत महत्वाच्या कविता आहेत. आंबेडकरवादी, दलित कवितेचे व्रत, परंपरा जी आहे ती संघर्षाची आहे. सबंध आंबेडकरी प्रेरणेतून आलेली दलित कविता बाजूला सारून निलेशकुमार हा संवादाच्या भूमिकेतून कविता लिहतो हे त्याच वेगळेपणं आहे. देशातल्या जगातल्या कोटी कोटी सर्वहारा वर्गाच्या कष्टकऱ्यांच्या वेदनेची कविता आहे. निलेशकुमारची कविता प्रश्न निर्माण करते. सर्व विचारवंत, प्रतिभावंत ज्या जागेवर हात टेकतात त्या जागेवरची ही कविता आहे.
निलेशकुमार हा विद्रोही कवी जरूर आहे पण तो विवेकीविद्रोही कवी आहे. ते पुढे म्हणाले, निलेशकुमारच्या कविता या माणसाच्या आनंदासाठीच्या कविता आहेत. माणसाच्या दुःख मुक्तीचा ध्येयवाद अधोरेखित करणाऱ्या कविता आहेत. संवादावर विश्वास असणारा हा कवी आहे. तुम्ही जर समता आमलात आणू शकत नसाल तर विद्यापीठातील विद्वान काय करताय? असा प्रश्न श्रीपाल सबनीस यांनी निलेशकुमार यांच्या विद्यापीठ या कवितेचा संदर्भ देत असताना केला आहे. पुढे ते बोलताना म्हणाले, “माझ्या प्रस्तावनेला आणि लेखणीला ही जात नाही.

सूत्रसंचालन निवेदक आरती गाढवे यांनी केलं. सदर काव्य संग्रहातील कवितेचे विवेक वंजारी व अमर मालन मारुती यांनी काव्यवाचन केलं, टीम तरुणाईचे अभिषेक आकोटकर यांनी कार्यक्रमाचे प्रास्ताविक केले आणि कार्यक्रमाचा शेवट अक्षय चव्हाण यांनी गायलेल्या वामन दादा कर्डक यांच्या व शंतनू कांबळे यांच्या ‘समतेच्या वाटेनं’ या गीताने झाला. यावेळी अर्थतज्ञ अजित अभ्यंकर, किसान सभेचे डॉ.अमोल वाघमारे, अभ्यासक प्रवीण निकम,प्रज्ञेश मोळक, कवी प्रा. हनुमंत भवारी आणि सामाजिक, राजकीय क्षेत्रांतील मान्यवर व महाविद्यालयीन विद्यार्थी मोठ्या संख्येने उपस्थित होते.